نیوزی لینڈ کے خلاف ٹیسٹ میچز میں پاکستان کا ریکارڈ؟

 پاکستان اور نیوزی لینڈ کے مابین کھیلے جانے والے اب تک کے تمام ٹیسٹ میچز میں پاکستان ٹیم کا ریکارڈ حریف کے مقابل بہتر رہا ہے۔

تفصیلات کے مطابق پاکستان اور نیوزی لینڈ کے درمیان 58 ٹیسٹ میچز کھیلے جا چکے ہیں، جن میں پاکستان نے 25 جب کہ نیوزی لینڈ نے صرف 12 میچز جیتے، دونوں ٹیموں کے درمیان 21 ٹیسٹ میچز ڈرا ہوئے۔

دل چسپ بات یہ ہے کہ نیوزی لینڈ میں بھی دونوں ٹیموں کے درمیان کھیلے جانے والے ٹیسٹ میچز میں پاکستان نے سبقت حاصل کر رکھی ہے، نیوزی لینڈ کے اندر اب تک 31 ٹیسٹ میچز کھیلے جا چکے ہیں جن میں پاکستان نے 10 میں کامیابی حاصل کی جب کہ نیوزی لینڈ نے 7 میچز جیتے اور 14 میچز کا فیصلہ نہ ہو سکا۔

نیوزی لینڈ میں دونوں ٹیموں کے درمیان 13 سیریز ہو چکی ہیں، جن میں پاکستان نے 7 میں کامیابی حاصل کی اور نیوزی لینڈ صرف 2 سیریز ہی جیت سکا۔

پاکستان کو نیوزی لینڈ میں پہلی بار کسی سیریز میں 1984-85 میں شکست ہوئی تھی، یہ دنیا کے مایہ ناز بولر وسیم اکرم کی ڈیبیو سیریز بھی تھی، تاہم پاکستان کو ہوم گراؤنڈ پر نیوزی لینڈ کے خلاف پہلا ٹیسٹ اور پہلی ٹیسٹ سیریز جیتنے کا اعزاز بھی حاصل ہے۔

نیوزی لینڈ میں پاکستان کی جیتی ہوئی آخری سیریز 2011 میں مصباح الحق کی قیادت میں کھیلی گئی تھی، تاہم 2 سال قبل یو اے ای میں کھیلی گئی اپنی ہوم سیریز میں پاکستان کو نیوزی لینڈ کے ہاتھوں دو ایک سے شکست کا سامنا کرنا پڑا تھا۔

واضح رہے کہ ‏پاکستان اور نیوزی لینڈ کی ٹیموں کے درمیان 2 ٹیسٹ میچز کی سیریز کا پہلا ٹیسٹ 26 دسمبر سے کھیلا جائے گا۔

Sharing is caring!

Comments are closed.