کیا کرکٹ کو دوبارہ اولمپکس کا حصہ بنایا جارہا ہے؟

آئی سی سی (انٹرنیشنل کرکٹ کونسل) کی جانب سے تمام رکن ممالک کو سوالنامہ ارسال کیا گیا ہے جس میں تجاویز طلب کی گئی ہیں کہ اگر کرکٹ، اولمپک مقابلوں میں شامل ہوتا ہے تو انہیں ممالک اور اولمپک منتظمین کی جانب سے کتنی آمدن متوقع ہے۔

ایک اور سوال میں پوچھا گیا ہے کہ اگر کرکٹ کو مستقل بنیادوں یا آزمائشی طور پر 2028 میں لاس اینجلس میں شیڈول اولمپک مقابلوں میں شامل کیا جاتا ہے تو کس حد تک فوائد مل سکتے ہیں۔

آئی سی سی کے رکن ممالک کو بھیجے گئے فارمز 2 نومبر تک واپس کرنے کی ہدایت کی گئی ہے جس کے بعد ان تجاویز کو رواں ماہ کے اختتام پر ہونے والی آئی سی سی میٹنگ میں زیرِ غور لایا جائے گا۔

آئی سی سی نے دو سال قبل بھی اسی نوعیت کے سوالنامے رُکن ممالک کو بھیجے تھے۔ تاہم کرکٹ کو اولمپکس میں شامل کرنے کے لیے کی جانے والی کوششوں میں اب تیزی آ رہی ہے۔

کرکٹ ماہرین کے مطابق بیشتر کرکٹ بورڈز کو اولمپک مقابلوں میں کرکٹ کی شمولیت سے معاشی فوائد حاصل ہو سکتے ہیں۔ خاص طور پر کرونا وبا کے پیشِ نظر کرکٹ بورڈز کو ہونے والے مالی خسارے کے تناظر میں اس تجویز کو پذیرائی مل سکتی ہے۔

Sharing is caring!

Comments are closed.